سكوت

سكوت

---

ما تستهونش قوي بالعزلة والسكوت.
ما تفرحش قوي بالكلام ولَمّة المعجبين والسمّيعة.
بَطَّل إعجابك الشديد باللغة.
في الجروب إمبارح، ستيف (دا مش إسمه الحقيقي) مريض من مرضانا، يعاني بشدة من عرض فرط الكلام. لا يتوقف عن الكلام طول ما هو صاحي، وغالبا وهو نايم؛ ... مع أعراض تانية كتير.
بيتكلم في كل حاجة وأي حاجة وكل وقت وأي وقت.
صحيح دمه خفيف، ويجبرك على الضحك وينشر نسمة من السعادة حواليه أحيانا، لكن ....
في جلسة العلاج الجمعي كان كارثة.
الجلسة كانت مفركشة تماما وبايظة بسبب موجات كلامه الطويلة.
إفتكرت اللي اتعلمناه في مستشفى المقطم، وتجارب السكوت التام.
قررنا إن يكون ما تبقى من الجلسة تجربة الصمت التام، ووافق هو.
لزم الأمر تنبيهه عدة مرات إن دا جروب ساكت.
بعد حوالي ربع ساعة من السكوت إنفجر في بُكا مرّ، بُكا ساكت من غير صوت.
بعد الجلسة الجمعية عملت له جلسة فردية، نص ساعة، كان فيها مختلف. كان حزين صحيح، ومتألم، لكن ببعض بصيرة.
هنكمِّل النهاردا.
الكلام وإتقانه وحجمه، أحيانا، غلوشة على الوجع، مهرب من ديالوج داخلي مهم، غطا لمشاعر مؤلمة؛ زيه زي أي إفراط، زيه زي سكوت الحزن،
زيه زي الفرحة المبالغ فيها.
حاجات كتير بنعملها نخبي بيها حقايق داخلية، ومواجهات مع أنفسنا الأخرى.
الكلام أحيانا قناع في حفلة تنكرية، متوهَّمة.